ເທດສະການຮູບເງົາຍີ່ປຸ່ນ Japanese Film Festival in Vientiane

What a Wonderful Family! (2016) 108’ / YAMADA Yoji ມີຄອບຄົວໃຫຍ່ຄອບຄົວຫນຶ່ງມີພໍ່ ແມ່ ລູກສາມຄົນ ແລະ ຫຼານອີກສອງຄົນ ເຊິ່ງ ຄອບຄົວລູກຊາຍກົກ ແລະ ລູກຫຼ້າແມ່ນ ອາໄສຢູ່ນຳກັນກັບພໍ່ແມ່ ສ່ວນຄອບຄົວລູກສາວຄົນກາງແມ່ນອອກເຮືອນແລ້ວ. ຜູ້ເປັນພໍ່ຊື່ Hirata Shuzo ແລະ ຜູ້ເປັນແມ່ຊື່ Hirata Tomiko ຜົວເມຍຄູ່ນີ້ໄດ້ ແຕ່ງງານຢູ່ກິນນຳກັນມາແລ້ວ 50 ປີ.ໃນວັນຄ້າຍວັນເກີດຂອງຜູ້ເປັນເມຍ ຜູ້ເປັນຜົວໄດ້ຖາມລາວວ່າຢາກໄດ້ຫຍັງເປັນຂອງຂວັນສຳລັບວັນເກີດເຈົ້າບໍ່? ຜູ້ເປັນເມຍເລີຍໃຫ້ຄຳຕອບໄປຢ່າງສະບາຍໃຈວ່າ ຂ້ອຍຕ້ອງການຢ່າຮ້າງກັບເຈົ້າ. ແລະແລ້ວຂ່າວການຢ່າຮ້າງ ກໍ່ໄດ້ກະຈາຍໄປທົ່ວຄອບຄົວ.

The Mohican Comes Home (2016) 125’ / OKITA Shuichi ຮູບເງົານີ້ແມ່ນຖ່າຍທຳຢູ່ທີ່ ແຂວງຮິໂຣຊິມາ ເຊິ່ງເປັນບ້ານເກີດ Yazawa Eikichi (ນັກຮ້ອງເພງຣັອກ) ຜູ້ທີ່ມີຊື່ສຽງໃນຍີ່ປຸ່ນ ເຊິ່ງຕົວລະຄອນຜູ້ເປັນພໍ່ Osamu ນັ້ນແມ່ນມັກນັກຮ້ອງຜູ້ນີ້ຫລາຍ ລາວເລີຍໃຫ້ຊື່ລູກຊາຍວ່າ: Eikichi, ສ່ວນຕົວລະຄອນຜູ້ເປັນແມ່ Haruko ແມ່ນຮັກມັກ Hiroshima Carp ເຊິ່ງເປັນທິມເບສບອນ Hiroshima ທີ່ມີຊື່ສຽງໃນຍີ່ປຸ່ນ. Mohichan (Eikichi) ໄດ້ອອກຈາກຮິໂຣະຊິມະ ໄປອາໄສຢູ່ໂຕກຽວ. Eikichi ລາວໄດ້ພະຍາຍາມຕາມຫາຜົນສໍາເລັດກັບວົງດົນຕີຂອງລາວ ແຕ່ກໍ່ລົ້ມເຫລວ. 7ປີຜ່ານໄປ Eikichi ໄດ້ກັບບ້ານເກີດ ເພື່ອມາຢ້ຽມຢາມບ້ານ ແລະ ແນະນໍາເມຍຂອງລາວໃຫ້ພໍ່ແມ່ໄດ້ຮັບຮູ້ພ້ອມທັງບອກຂ່າວດີວ່າ: ເມຍຂອງລາວກຳລັງຖືພາຢູ່. ຫລັງຈາກນັ້ນພໍ່ຂອງ Eikichi ໄດ້ລົ້ມປ່ວຍເປັນໂລກມະເລັງຂັ້ນສຸດທ້າຍ.

Chihayafuru Part I (2016) 111’ / KOIZUMI Norihiro Chihaya ນັກຮຽນປະຖົມປໍ 6 ໄດ້ພົບກັບ Arata ນັກຮຽນໃຫມ່ທີ່ຍ້າຍມາຈາກແຂວງ Fukui ເຖິງແມ່ນວ່າ Arata ຈະເປັນຄົນເບິ່ງຄືສະຫງົບສະງຽບ ແຕ່ລາວກັບມີທັກສະການຫຼີ້ນເກມ Karuta ທີ່ຄາດບໍ່ເຖິງ ເຊິ່ງເຮັດໃຫ້ Chihaya ນັ້ນປະທັບໃຈໃນທ່າທາງການປັດແຜ່ນ Karuta ທີ່ເຕັ້ມໄປດ້ວຍຄວາມມຸ່ງໝັ້ນ ແລະ ໄວກວ່າໃຜ. Taichi ແລະ Chihaya ເປັນຫມູ່ກັນມາແຕ່ສະໄຫມເປັນເດັກນ້ອຍ. ທັງສາມ Arata, Chihaya ແລະ Taichi ໄດ້ສະນິດສະຫນົມກັນ ຜ່ານການຫຼີ້ນເກມ Karuta. 4 ປີຕໍ່ມາ Chihaya ກໍ່ໄດ້ເຂົ້າເປັນນັກຮຽນມໍປາຍ ແລະ ໄດ້ຮູ້ວ່າ Arata ຜູ້ທີ່ໄດ້ກັບໄປແຂວງ Fukui ນັ້ນ ບໍ່ໄດ້ຫຼີ້ນເກມ Karuta ແລ້ວ, ແຕ່ວ່າ Chihaya ແລະ Taichi ເຊື່ອວ່າພວກເຂົາຈະໄດ້ພົບກັບ Arata ອີກຄັ້ງ. ດັ່ງນັ້ນ, ພວກເຂົາຈິ່ງໄດ້ເລີ່ມຈັດຕັ້ງສະໂມສອນ Karuta Club ຂື້ນຢູ່ທີ່ໂຮງຮຽນມໍປາຍ Mizukawa ຂອງພວກເຂົາ ແລະ ໄດ້ຮ່ວມງານແຂ່ງຂັນໃນລະດັບໂຮງຮຽນໃນທົ່ວໂຕກຽວ ພວກເຂົາຕ້ອງໄດ້ພົບກັບອຸປະສັກຫຼາຍໆຢ່າງ ໃນການຈັດຕັ້ງສະໂມສອນ, ການຝຶກຊ້ອມ ແລະ ການແຂ່ງຂັນ.

Chihayafuru Part II (2016) 103’ / KOIZUMI Norihiro Arata ແມ່ນຫມູ່ສະນິດຂອງ Chihaya ໃນສະໄຫມເຍົາໄວ ແລະ ຮ່ວມຫຼີ້ນເກມ Karuta ນໍາກັນໃນສະໄຫມຮຽນ ແລະ ທັງສອງກໍ່ມີຄວາມຜູກພັນກັນຫລາຍ, ກ່ອນທີ່ໝູ່ຜູ້ທີ່ລັກມັກ Chihaya , Taichi ຈະເຂົ້າມາສູ່ເກມການຫຼີ້ນອີກຄົນ Taichi ເປັນຜູ້ຊາຍຜູ້ຫນຶ່ງທີ່ເຂົ້າມາໃນຊີວິດຂອງ Chihaya ແລະ ຮັກລາວ ເມື່ອ Taichi ໄດ້ຮູ້ເລື່ອງລາວໃນສະໄຫມເຍົາໄວ ແລະ ຄວາມຜູກພັນຂອງສອງຄົນລະຫວ່າງ Chihaya ແລະ Arata ກໍ່ເຮັດໃຫ້ລາວເກີດຄວາມຫຶງຫວງຂື້ນ ດັ່ງນັ້ນ ການແຂ່ງຂັນເພື່ອເດີມພັນດ້ວຍຄວາມຮັກຈິ່ງໄດ້ເກີດຂື້ນ ລະຫວ່າງ Taichi ກັບ Arata ດ້ວຍເຫດນັ້ນຈິ່ງກໍ່ເກີດເປັນເລື່ອງລາວຄວາມຮັກ ແລະ ມິດຕະພາບຢູ່ເທິງເກມ Karuta ທີ່ເຊື່ອມທັງສາມຄົນເຂົ້າໄວ້ດ້ວຍກັນ. ນອກນີ້ Chihaya ຍັງມີຄວາມຫວັງທີ່ຈະນຳພາທີມຊະນະງານແຂ່ງຂັນການຫຼີ້ນເກມ Karuta ທົ່ວປະເທດອີກດ້ວຍ ແລະ ນາງຍັງໄດ້ຫວັງທີ່ຈະເອົາຊະນະລາຊະນີ Shinobu Wakamiya ຜູ້ທີ່ມີສີມືທີ່ເກັ່ງຂັ້ນເທບ ແລະ ຫຼີ້ນເກມ Karuta ດ້ວຍມືຊ້າຍ.

The Magnificent Nine (2016) 129’ / NAKAMURA Yoshihiro ຮູບເງົາເລື່ອງນີ້ເວົ້າເຖິງຫມູ່ບ້ານທີ່ທຸກຈົນແຫ່ງຫນຶ່ງຢູ່ໃນປະເທດຍີ່ປຸ່ນສະໄຫມເອະໂດະເຊິ່ງມີເສດຖະກິດທີ່ຟືດເຄືອງ ແລະ ການກູ້ຍືມເງິນລະຫວ່າງເຈົ້າສັກດີນາກັບຊາວບ້ານ. ປະຊາຊົນທີ່ອາໄສຢູ່ຫມູ່ບ້ານຍາກຈົນແຫ່ງນີ້ມີຊີວິດການເປັນຢູ່ທີ່ຍາກລຳບາກຫລາຍ ເພາະຖືກບັງຄັບໃຫ້ໃຊ້ແຮງງານ, ເສຍໜີ້ພາສີຢ່າງໜັກໜ່ວງໃຫ້ແກ່ ເຈົ້າສັກດີນາຜູ້ປົກຄອງເມືອງ. ໃນນັ້ນ ມີຜູ້ນຳຂອງບ້ານ 9 ຄົນ ເຊິ່ງນໍາໂດຍ Juzaburo ໄດ້ພາກັນປຶກສາຫາລືເພື່ອຫາວິທີແກ້ໄຂຊີວິດການເປັນຢູ່ຂອງຊາວບ້ານໃຫ້ດີຂື້ນກວ່າເກົ່າ ເຊິ່ງໄດ້ພາກັນວາງແຜນລົງທຶນທາງການເງິນເພື່ອທີ່ຈະພິກຜັນໂຊກຊາຕາຂອງພວກເຂົາເຈົ້າ.

An (2015) 113’ / KAWASE Naomi ໃນມື້ທີ່ມີດອກສະກຸຣະເບັ່ງບານຢ່າງສວຍງາມນັ້ນ, ມີຮ້ານເຂົ້າໝົມ Dorayaki (ເປັນເຂົ້າໝົມຊະນິດໜຶ່ງຂອງປະເທດຍີ່ປຸ່ນ) ແຫ່ງໜຶ່ງ ທີ່ຕັ້ງຢູ່ລຽບຕາມທາງຍ່າງຂອງຖະໜົນໃຕ້ຕົ້ນດອກສະກຸຣະ ໃນຄະນະທີ່ເປີດຮ້ານຢູ່ນັ້ນ ແມ່ເຖົ້າ Tokue ໄດ້ມາຂໍສະໝັກວຽກນໍາຮ້ານດັ່ງກ່າວ ເຊິ່ງເຈົ້າຂອງຮ້ານ Sentaro ເຫັນວ່າການເຮັດຂະຫນົມນີ້ແມ່ນຕ້ອງໃຊ້ແຮງງານ ຈິ່ງຕອບປະຕິເສດລາວໄປ, ແຕ່ວ່າແມ່ເຖົ້າກໍ່ບໍ່ໄດ້ລະຄວາມພະຍາຍາມທີ່ຈະມາຂໍເຮັດວຽກຢູ່ຮ້ານນີ້, ໃນຕອນເຊົ້າມື້ໜຶ່ງແມ່ເຖົ້າ Tokue ກໍ່ໄດ້ເຮັດໄສ້ຖົ່ວແດງກວນທີ່ຫອມຫວານມາວາງໄວ້ໃຫ້ Sentaro ຊິມລອງເບິ່ງ ເມື່ອລາວໄດ້ຊິມເບິ່ງແລ້ວ ກໍ່ປະທັບໃຈກັບລົດຊາດທີ່ແຊບທີ່ບໍ່ເຄີຍກິນມາກ່ອນ. ດັ່ງນັ້ນ, ລາວຈິ່ງຮັບແມ່ເຖົ້າ Tokue ເຂົ້າເຮັດວຽກຢູ່ທີ່ຮ້ານຂອງລາວ. ແມ່ເຖົ້າ Tokue ໄດ້ສອນວິທີເຮັດໄສ້ຖົ່ວແດງກວນໃຫ້ກັບ Sentaro ເພື່ອໄປໃສ່ເປັນໄສ້ຂອງເຂົ້າໝົມ Dorayaki ຂອງລາວ ແລະ ຮ້ານລາວກໍ່ໄດ້ຜົນຕອບຮັບທີ່ດີຈາກລູກຄ້າ. ມື້ໜຶ່ງໃນຄະນະທີ່ລາວເປີດຮ້ານຢູ່ນັ້ນເອງ ເຈົ້າຂອງທຸລະກິດທີ່ລາວເຮັດໃຫ້ນັ້ນ ໄດ້ມາບອກລາວວ່າ ແມ່ເຖົ້າ Tokue ທີ່ເຈົ້າຮັບມາເຮັດວຽກນຳນັ້ນ ລາວໄດ້ມີເຊື້ອພະຍາດຂີ້ທູດ.

The Boy and The Beast (2015)119’ / HOSODA Mamoru ໃນໂລກແຫ່ງນີ້ນອກຈາກມີໂລກມະນຸດແລ້ວ ແຕ່ຍັງມີອີກໂລກຫນຶ່ງທີ່ແຍກອອກຈາກໂລກມະນຸດເຮົານັ້ນກໍ່ຄື ໂລກມະຫັດສະຈັນຂອງສັດປະຫລາດ, ໂລກມະນຸດ (Shibuya) ແລະ ໂລກສັດປະຫລາດ (Jutengai). ມື້ຫນື່ງ ເດັກຊາຍທີ່ບັງເອີນໄດ້ພົບກັບສັດປະຫລາດ Kumatetsu ນັ້ນ, ໄດ້ຕັດສິນໃຈເຂົ້າໄປໃນໂລກຂອງສັດປະຫລາດກັບ Kumatetsu ແລະ ໄດ້ຖືກຕັ້ງຊື່ ໃຫມ່ໃຫ້ວ່າ Kyuta, Kumatetsu ໄດ້ສອນວິຊາການຕໍ່ສູ້ໃຫ້ Kyuta ແລະ ຕັ້ງຕົວເອງວ່າເປັນຜູ້ຝຶກສອນສີລະປະການຕໍ່ສູ້ ເຊິ່ງຕອນທຳອິດ Kyuta ນັ້ນບໍ່ຍອມຮັບ Kumatetsu ເປັນອາຈານ. ທັງສອງໃຊ້ຊີວິດຮ່ວມກັນ ຝຶກຊ້ອມການຕໍ່ສູ້ຮ່ວມກັນ ໂດຍມີ Hyokushubo ແລະ Tatara ຄອຍເປັນກຳລັງໃຈ ແລະ ທີ່ປຶກສາໃຫ້ຢູ່ຂ້າງໆ ເລີຍເຮັດໃຫ້ທັງສອງຕ່າງຝ່າຍຕ່າງກໍເຕີບໂຕເປັນຜູ້ໃຫຍ່ຮ່ວມກັນ ແລະ ເກີດມີຄວາມຜູກພັນແບບພໍ່ລູກກໍ່ໄດ້ກຳເນີດເກີດຂື້ນ.

The Anthem of the Heart (2015) 119’ / NAGAI Tatsuyuki ໃນເມືອງແຫ່ງໜຶ່ງຂອງປະເທດຍີ່ປຸ່ນ, ເຊິ່ງມີເດັກນ້ອຍຍິງຄົນໜຶ່ງທີມີຊື່ວ່ານາງ Naruse Jun, ແລະ ລາວຈະມັກຝັນເຖິງການໄດ້ເຂົ້າໄປໃນປະສາດໃນພູເຂົາ, ແຕ່ວ່າໃນຄວາມເປັນຈິງປະສາດນັ້ນແມ່ນໂຮງແຮມ. ມື້ຫນຶ່ງນາງ Jun ໄດ້ເຫັນພໍ່ຂອງລາວອອກມາຈາກໂຮງແຮມກັບຜູ້ຍິງຄົນອື່ນ ແລະ ລາວກໍ່ໄດ້ນໍາເລື່ອງດັ່ງກ່າວໄປບອກແມ່ຂອງລາວ, ເຫດການດັ່ງກ່າວໄດ້ເຮັດໃຫ້ພໍ່ແມ່ຂອງລາວຍ່າຮ້າງກັນ. ນາງ Jun ຮູ້ເສຍໃຈຕໍ່ກັບເຫດການດັ່ງກ່າວຫລາຍ ແລະ ລາວໄດ້ຂໍໃຫ້ພໍ່ຢູ່ກັບລາວ ແຕ່ພໍ່ຂອງລາວມີພຽງແຕ່ຄຳອຳລາແລ້ວຈາກໄປ. ໃນຄະນະທີ່ລາວນັ່ງຮ້ອງໄຫ້ຢູ່ນັ້ນເອງ ລາວກໍໄດ້ພົບເທດໄຂ່ ແລະ ໄດ້ເລົ່າເລື່ອງທີ່ເກີດຂື້ນໃຫ້ກັບເທບໄຂ່ຟັງ ເພາະເຫດການນີ້ເຮັດໃຫ້ລາວຮູ້ສຶກຜິດ ແລະ ຂໍໃຫ້ເທບໄຂ່ສາບປິດປາກລາວເອງ ດັ່ງນັ້ນ ຈຶ່ງເຮັດໃຫ້ລາວບໍ່ມີສຽງ ຫລື ຖ້ອຍຄໍາໃດຯອອກມາຈາກປາກຂອງນາງອີກ.

ເທດສະການຮູບເງົາຍີ່ປຸ່ນ Japanese Film Festival in Vientiane

Be the first to comment

Leave a Reply Cancel reply